المؤامرة الثغرة - من فصل المدرسة إلى طرد الجدة من على مسرح الفرح

كتب اشرف عبده
في نفس اللحظة اللي طردتي فيها جدتك من على المسرح عشان شكلها ما يليقش بفرحك.. نسيتي إن إيديها دي هي اللي شالتك وانتي صغيرة، وإن ضهرها اللي انحنى ده انحنى وهو شايل همك.
الفرح الحقيقي كان هيكمل لو بوستي إيديها قدام الناس كلها.. لكنك اختارتي تكملي فرحك ناقص.
الجدة اللي طردتيها اليوم هي اللي كانت بتدعيلك كل ليلة وإنتي ما تعرفيش.
بكرة هتعرفي إن الصورة اللي مسحتيها من على المسرح هي اللي كانت هتكون أجمل صورة في ألبوم فرحك.

قال رسول الله ﷺ "ليس منا من لم يرحم صغيرنا ويوقر كبيرنا"
جدتك اللي وقفتيها على المسرح وطردتيها.. هي بركة البيت، دعوتها هي اللي كانت هتحمي زواجك، ورضاها هو اللي كان هيفتح لك أبواب السعادة.
طردتي البركة من فرحك بإيدك.
"وقضى ربك ألا تعبدوا إلا إياه وبالوالدين إحسانا".. فما بالك بالجدة التي هي أم الأم.
فرح يبدأ بعقوق لن يكتمل.

عروسة طردت ماضيها عشان تفرح بحاضرها.. فخسرت الاثنين.
اللي مالوش خير في جدته.. مالوش خير في جوزها.
كنتي تقدري تكوني تريند بالجمال.. اختارتي تكوني تريند بقلة الأصل.
المسرح شال كل الناس.. وما شالش جدتك؟

تخيلوا.. جدة لبست أحلى حاجة عندها، ومشيت بالعافية، وطلعت المسرح عشان تفرح بحفيدتها وتتصور معاها..
فالحفيدة قالت لها انزلي.. شكلك مش لايق.
المشهد ده مش طرد جدة من مسرح.. ده طرد للرحمة من قلب.
بكرة بنتك هتعمل فيكي نفس اللي عملتيه.. وكما تدين تدان.

هذه الصورة ليست حادثة فردية.. هذه هي الثغرة الرابعة التي كتبت عنها.
جيل تربى في مدارس خاصة بلا تربية أخلاقية، علموه اللغات والاتيكيت ونسيوا يعلموه يعني إيه "جدتي".
عروس ترى جدتها عاراً على المسرح هي نتاج تعليم يرى القيمة في المظاهر لا في الجذور.
المخدرات مش بس شابو وآيس.. في مخدر أخطر اسمه "مخدر المظاهر والتريند" اللي يخلي البنت تبيع أصلها عشان لقطة.
فرح بدأ بطرد الجدة لن ينتهي بالسعادة.